٦‏/١٠‏/٢٠١٠

انت اللي هايتغير لما يكون لك صوت

انا مش هاينفع اسيب البلد ديه لا عندي حد قريب يقدر يشدني علي بلد خليجيه ولا عندي مؤهلات تنجحني للحصول علي تاشيره هجره لبلد اوربيه
يعني قعده قعده لا وكمان عندي اطفال مسؤله عنهم اني اعلمهم
اعلمهم الايجابيه ---حقهم في الاختيار في الحياه ----اعلمهم الاعتراض علي اي حاجه غلط يشوفوها
لكن قبل ما اقولهم كل ده لازم اقولوه لنفسي
ايوه انا سلبيه وخائفه وقعده في بيتنا وناقمه علي كل شيء من غير ما اعمل حاجه
احوال البلد منيله فساد وغلاء وتزوير وبهدله ووساطه والفلوس هي اللي بتتكلم
واللي ملوش ضهر ينضرب وتعليم بايظ وعلاج مسمم يعني من الاخر خربانه خربانه
لكن ما ينفعش اقعد اقول واكتب الكلام ده وانا في بيتنا او وانا قدام الكمبيوتر اطلع كام كلمه مخنوقه جوايا وخلاص
ما انا لازم اتحرك واعمل حاجه صح لا هاقول مظاهرات ولا خناقات الحاجات ديه من وجهه نظري لا تقدم ولا بتغير شيء مجرد شحنه عاطفيه تخرج في شكل اصوات
عشان كده لما فكرنا نعمل الحمله ديه كان هدفنا نعمل شيء ايجايبي عملي
معك بطاقه انتخابيه روح استخدم حقك في الاختيار
طبعا الاغلب هايستهزاء من كلامي
وهايردد الكلمات المعروفه الانتخابات مزوره مزوره واللي هم عايزينوه هو اللي هاينجح
حتي لو كان ده حقيقي انا قررت اني ما كونش من الاصوات اللي هاتتزور
هاروح وابطل صوتي مش هخلي حد يستخدم حقي بنيابه عني
ممكن نكون مجانين بس اي حاجه كبيره بدات صغيره وبدات بناس قليله بتحلم ومتمسكه بحلمها
انت وانا جربنا القعده في البيت والشتيمه في الظروف علي الفاضيه والمليانه
طيب ما تجرب وتنزل وتستخدم حقك
موعدكش ان النتيجه هاتتغير بس هو اللي اكيد انت اللي هاتتغير علي الاقل قدام نفسك مش مشارك في التزوير
مش مشارك في الغلط
انزل واستخدم حقك
انزل واختار ما تريده
انزل واقول رايك حتي لو هاتبطل صوتك
خلي عندك امل
خلي عندك حلم ليك ولاولادك
خلي عندك صوت

لينك الموقع هنا 
والفيديو الاول 
الفيديو الثاني 
الفيديو الثالث
وجروبنا علي الفيس بوك