راي بعض الناس اللي بره الفيس بوك في الاستفتاء
دائما ما احب ان اتكلم كثيرا مع الناس اللي بره الفيس بوك اللي مالهاش فيه يعني كل معلوماتها عليه ان شويه شباب تقعد عليه وتتكلم وخلاص بس زاد الاهتمام به مع شويه جديه تظهر عليهم لما يجي الكلام عنه بعد ثوره 25 يناير
المهم الناس اللي بره الفيس بوك دول بالنسبه لي هم الترمومتر بتاعي عشان اعرف حال الناس في البلد عامل ايه وبيفكروا ازي مع اختلاف تفكيرهم واقدر اقول انها عينه الي حد ما تجمع الكثير من صفات المصريين العادين اوي اللي بيقدورا بالملايين اللي سمهم بعض الناشطين بحزب الكنبه اللي منزولش الميدان اللي كانوا بيتابعوا الثوره في التلفزيونات الملايين اللي تفنن النظام السابق ان يجعلهم جهلاء مرضنين زي الحمير دائرين في ساقيه لقمه العيش اقسي احلامهم غداء بكره وسقف يحميهم ويدعوا ربنا يبعد عنهم اولاد الحرام
اكلمكوا عن اول عينيه من مجتمعنا وانا جزء منه ومش بعمل حاجه غير اني بتأملهم في صمت حزين ---الموظفين --بحكم عملي في وزاره حكوميه الناس ديه غلابه جدا وبتكلم عن الموظفين الصغيرين اللي مرتباتهم بتخلص 5 في الشهر اللي عايشين علي الجمعيات والشغلانات التاتيه اللي فاتحينها في مكاتبهم اللي فاتح مكتبه بوتيك بالتقسيط او محل اجهزه كهربائيه برضوه بالتقسيط ده حتي منهم فاتح مكتبه للتوابل والاعشاب الطبيه والاقل منهم بقي شويه في القيمه الوظيفيه اللي هم السعاه والفراشين والعمال فدول بقي منه
قهوجيه الوزاره و منهم اللي فاتحين مطاعم للموظفين ومتهم السعاه الستات الشاطره اللي بتوفر للسيده العامله كل الاكل والخضار متقشر جاهز علي الطبخ ده غير خدمه الدليفري للاكل المستو بشكل نهائي ديه خدمه جديده اضيفت مؤخرا ومنهم كمان اللي يجي ينضف البيوت بس اهم حاجه محدش يعرف وطبعا الكل بيبقي عارف ومنهم الشاطر اللي حافظ مركزه بيكون متعلم صنعه ويروج لنفسه عشان الموظفين تجيبوه يصلح المكسور عندهم في بيوتهم ومافيش مانع لو كان الدفع برضوه بالتقسيط
عالم الموظفين هو صاحب الشعار الاكبر التقسط والجمعيه ايد واحده
طبعا اكبر ما يميز الموظف انه مش بيشتغل ايون مش بيشتغل القسم اللي فيه 10 الشغل يستحق يتوزع علي 3 افراد بس وهو ده اللي بيحصل 3 يشتغلوا وشغل خفيف كمان والباقي يشرب الشاي ويفطر ويقرا الجرنال ويقعد ينم ويرغي ويتخانق علي مكأفاه بعشره جنيه جئت للاوضه اللي جنبه وهو لا تعليم الموظفين بيختلف من مكان للتاني بس بيجمع اغلب الدرجات التعليميه اللي معه اعداديه واللي معه ثانويه واللي معه معهد وطبعا الجامعه كولكشن حلو كده من التفاوت التعليمي في مكان واحد الافكار بقي اللي علي هئيه كلام تروح وتيجي بين الجميع في شكل رائع من التأمل ليهم في حد يرغي وهو مش فاهم وواحد يسمع ومكبر وواحد قرفان وواحد مش فارقه معه نهائيا وكتير اوي يقعد يسب ويشتم ويدعي علي الحكومه وحتي بعد الثوره برضوه بيشتموا
النهارده كان حوار عن التعديلات الدستوريه ومين هايروح يقول لا او نعم وليه شويه كلام عجب عجب سيبكوا بقي من الفيس بوك وحوارتنا المثقفه المعبره اللي بتخرج مننا بالشوكه والسكينه هاعرض كده شويه اراء للمعرفه هذا العالم اللي بره حياتنا الافتراضيه
واحد قالي :طبعا هاروح واقول نعم الشيخ في الجامع قالي لازم اقول نعم لاحسن يلغوا الماده التانيه هم عايزين مننا ايه احنا مسلمين وهانفضل مسلمين
حاولت افهموا ان ده مالوش علاقه بده طبعا لا حياه لمن تنادي
واحده تانيه بقي دماغ :انا مالي اروح اقول ايه نعم ايه ولا لا ايه انا لا رايحه ولا جئيه المهم معرفتش اخبار المكأفاه جئيه امتي الواد عندي عايزه اديلوه درس للانجليزي
واحد تاني -يا مدام طبعا نعم احنا عايزين الاستقرار يرجع تاني والجيش يمشي عجبك كل يوم المظاهرات علي ابواب الوزاره ويوقولك تعينات جديده هو احنا عارفين نقعد لما يجيبوا ناس جديده --ايه علاقه ده بده متعرفش وبلاش نقاش احسن
شابه بقي صغننه كده تقول ديه اكيد كانت في التحرير ----انا - هاتروحي تصوتي
هي : لا لا انا خطيبي قالي لا يعاي ايه واحده بنت تروح مكان وتعمل كده
وشي طبعا جاب الف لون ونظرات الاسبهلال علي وشي ولا نطقت بكلمه
المدير بقي قولت راجل فاهم وواعي --طبعا نعم --وقعد يرغي ويتكلم لو خرجت بكلمه مفيده منه كنت قدرت اكتبها
حد تاني --انا الصراحه لسه مقررتيش --انا قولت حلو اهو ده اقدر اتكلم معه ونتناقش لغايه ما قال اللي قالوه
-- بصي حضرتك اللي احنا فيه ده غضب من عند ربنا احنا مش عارفين عايزين ايه احنا كل اعملنا منيله عشان كده ربنا مش هايوهدنا للصح
انا قمت من قداموه عشان بس متشلش
قليل اوي اللي قالي لا وياريت حتي فاهم لا ليه
خلاصه الحوارت اللي دارت في مجتمع الموظفين ياما نعم وخلاص ياما نعم للاسباب دينيه يا ما مش رايح وهاكبر ياما لا وده قليل اوي بس اللي شيء الواحد اللي كل متفق عليه بلا استثناء انه محدش فاهم حاجه وماشين وراء اي حد بيقول اي حاجه وخلاص اما حد يقف ويفكر قليل اوي اللي قابلته في المجتمع ده وعايز يعمل كده
كلامي ممكن يطلع غلط وتأملاتي كمان عشان اكيد مصر مش في العينيه ديه وبس
انا حبت انقل صوره صغيره واعمل عليها زوم عشان نشوف بعض الناس اللي بره الفيس بوك
بس اللي هو اكيد اني عايزه اهرب من دماغي شويه واكتب عن حاجات شايفها وعايزه انقلها
