٥‏/٦‏/٢٠٠٧

برغم النكسه بس بحبها




مره تاني عشانك يا مصر القصيده كلها لصلاح جاهين

على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا أسمعها مشخوطة
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أو حيحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد أقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد
على اسم مصر

هناك ٦ تعليقات:

ذو النون المصري يقول...

اهلا و سهلا و مرحبا بكي في عالم المدونين و مبروك علي افتتاح المدونه و ارجو لكي التقدم المستمر في التدوين
بين مدونتي و مدونتك وجه شبه كبير في موعد الافتتاح
فانا انشات مدونتي في ذكري نصر اكتوبر العام الماضي و كانت اول تدويناتي في يوم 6 اكتوبر و انتي انشاتي مدونتك في ذكري النكسه
.........
مبروك مره تانيه مع خالص امنياتي بالتوفيق

Xee يقول...

كلنا هذا الرجل

Xee يقول...

جاهين مش ناصر

:)

غير معرف يقول...

:)

Heart Beat يقول...

عزيزتي ...
دي اول مرة ليا في مدونتك و كلام صلاح جاهين ده كنت بتدور عليه من كام يوم كده...

حسيت يومها ان مصر وحشاني اوي و افتكرت الحديث اللي كان متبادل بالابيات دي في فيلم الآخر.

مرة واحد قال لي انا احب البلد ليه اذا كان هي مش بتحبني...ماعرفش مين اللي قال له ان مصر مش بتحب ولادها...قلت له مصر بتحبك و بتحب كل اللي فيها و اللي بعيد عنه كمان بس لو كل الناس زيك كده مش هايحبوها زي ما هي بكل اللي فيها يبقى ازاي تتوقع اننا ننهض بالبلد.

اشكرك على كلام صلاح جاهين ده.

Abo Amr يقول...

اي حد بيحب جاهين و بيكتب اشعارة و ينشرها
يستاهل يتحب و يتعرف
تحياتي الخالصة ليكي
بالمزيد من حب مصر ليكي و لينا