26‏/8‏/2007

الجانب المظلم في نفسنا

ليه احنا ازدواجين في حياتنا و تفكرنا و افعالنا ؟
ليه احنا بنعيش بوشين مع نفسنا و مع الناس ؟
اسئله ده تحمل الجانب السلبي و الجانب المظلم
الجانب السلبي و اقصد به الجانب المخلاف للظاهر امام الناس و امام نفسنا
يعني مثلا كثير من الرجال الاي بيدعوا الفضيله و رافعين رايه القيم و الاخلاق يقعدوا يشتموا و يسبوا في الاغاني الخليعه و المغنيات العرايا الاي و جعين دماغنا و عيونا طوال اليوم في الكليبات
و هما يروح بالليل يقعدوا يشغلوهم و يسمعهوم و يستمتعوا اوي بحركاتهم الخليعه و مش بعيد
و يحيولوا علي قنوات البرنو علشان تكمل الليله
ناس تانيه رافعين شعارات الصدق و الحق و العدل في اعمالهم و هم يفعلون افعال الفساد و الخراب و الكذب
و يدوسوا علي رقاب الناس
و ناس تانيه عامله نفسها متدينه و هي متحلفه مع الشيطانين للوصول لاغراضهم
بس اسواء الناس من وجهه نظري من يظهر الحب و القرب والاي في قلبه هو الكره و الحقد و عند اول فرصه يطعنك بلا تردد لتكتشف الخدعه الكبري
و مظاهر تانيه غريبه في حياتنا مثلا
اخوي يقطع رقبتي لو شفني مع حد و هو بيمسك ايد البت بتاعته عادي
جوزي يطلقني لو عرف بكلم حد عادي و هو نازل ضحك و هزار مع زميلات العمل
ابوي يموتني لو صممت اختار و اتجوز الاي انا عايزه و هو يعرف و يخون و يتجوز علي امي
الحكومه تسجني لو سرقت جنيه و هي و كله مال النبي و مال بلدنا
الناس تمشي وراء اشاعه و كدبه و تعملها فتنه و هم متاكدين ان كل ده غلط في غلط
جوانب سلبيه كتيرررررر اوي القلب بيتوجع لما بيقول عليها و يشوفها

اما الجانب المظلم الاي قصده ده بقي حكايته حكايه و يمكن البوست ده مكتوب عشان الجانب المظلم ده
اعتقد انه في حياتنا نحن الشرق فقط ده و حهه نظر شخصيه جدا مش جايبها من عند حد
ماشي يا ستي انت تقصدي ايه بالجانب المظلم ؟
هاشرحه اهو
اقصد ان في حاجات كتير في حياتنا بنتكلم عليها و متحمسين ليها اوي و نظهرها للناس
بس لما نقعد مع نفسنا و نراجع كلامنا نلاقينا مش مقتنعين بكلامنا ده بس قولنا عشان نسير الجو و كمان عشان محدش يقول علينا منعرفش ده احنا نعرف كل حاجه – ما هو ده الاي جايبنا وراء –
و في حاجات تانيه مانعرفهش او مش متاكدين من صدقها او عايزين نعرف بس مكسوفين خائفين محروجين
ما احنا لازم نكون ولاد ام العريف
فنعد نجيب كلمه من الشرق و تانيه من الغرب و نردد كلام سمعنها و احنا مش مقتنعين و لا عارفين حاجه
و نعقد مع نفسنا و نلومها انتي مش عارفه طب بتكلمي ليه
و ده بيقودني لنقطه اكتر من مهمه
ليه احنا مش صراحاء مع نفسنا و مع الغير
و الغير مش متقبل الصراحه ده و ليه نفسنا نسال اسئله كتير في حاجات كتير
و مكسوفين و محرجين
مثلا مثلا
في بعض الناس متحيرين في بعض جوانب في الدين و عندهم اسئله كتير في مواضيع معينه
يعني دماغهم شغاله شويه بيفكروا ده حقهم و لما يعرضوا اسئله غريبه شويه او غير معتاده
يبتدا الهجوم عليهم و علي طول التهمه متوجه انت كافر لا تعرف شيء
طب فهمني قبل ما تتهمني
و نسال اسئله تانيه
طب اتواجه لمين ؟ و مين الجهه الاي اثق في كلمها و حجتها؟
و مين الاي هايحترم عقلي و اسئليتي و ليه ممنوع الاقتراب من هنا او هنا؟

انا بضرب مثل و ممكن يكون كلامي ده نوع من الازدواجيه الاي اتربينا و عيشنا فيها

مثال تاني علي الجانب المظلم و هي العلاقه بين قلوب الناس ايوه قلوب الناس
احنا بنحمل الاف من القلوب و المشاعر الازدواجيه و احنا بنتعامل مع الناس ده هاتعامل معه
و هاكون مئه مئه معه عشان عنده مصلحه ليه امامه حبيبي و في قلبي هاخد مصلحتي منك و بعدين بالجذمه
بين الزوجين مثلا ايوه يا حبيبي ايوه يا حبيبتي و في القلوب بلوي متلاتله
غضب علي خيانه علي اساءه علي شويه قرف و زهق من عاميله او عاميلها و مافيش صراحه
سكتم بكتم
و السب اهي حياه و ماشيه و اتجوزنا و خلاص
عشان كده البيوت الحقيقه بتكون في القلوب مش المظاهر الخداعه الكذابه

الحمد لله الحمد لله ان مشاعرنا ملهش رائحه كانت هاتكون مصيبه كبيره سبحان الل
ه

طب ايه الحل ؟

نحاول نكوين صادقين مع نفسنا اولا لان الصدق مع النفس بدايه الحل
و كره الازدواجيه و محاوله اكون خارجي مثل داخلي
بعد كده احاول اكون صادق مع الغير احاول ابذل محهود و اعقد النيه علي كده اكيد ربنا هايوقف معنا
اما بالنسبه للجانب المظلم ده مشكله كبيره و حله لازم يكون حل جماعي مش فردي
يعني المجتمع لازم يتقبل افكار الغير و يتعامل معه بعقل و ليس بتهم و هجوم
و يعطي الفرصه و الحريه انه يسأل عن أي شيء مش عارفه
من غير كسوف او خجل او نظره استصغار له و افكاره
يعني دعوه لتحرر العقل و الافكار بهدف المعرفه و الثبات علي الحق
الصراحه الصراحه تؤلم و لكن تدوي الجروح و تسهل الطريق من بدايته
ده مجرد افكار بس ياتري انا نفسي هاعرف اطبقها
و هاقدر اتغلب علي اتزرع جوايا من حولي و من المجتمع
هاحاول ربنا يساعدني
-------------------------------------------

هناك 8 تعليقات:

يا مراكبي يقول...

معاكي في كل اللي قلتيه .. ما سيبتيش حاجه للواحد ممكن يعلق بيها .. أي كلام عايز أقوله موجود في البوست

أحييكي جدا على البوست الصريح والجريء ده

harmless يقول...

بعض الناس يملكون فكرا احاديا مبنى على بعض المنطق ولكنه مضاد لطبائع الاشياء ولا يصلح الا فى اوراق الكتب على ارفف المكتبات او فى خطب عصماء فى ندوات الحالمين والرومانسيين

يا عزيزتى هل تريدين الناس ماكينات كمكن التريكو لكل منهم مسار لا يخطئه وطريق لا يحيد عنه وفكر منطبق على السلوك بنسبه مائه فى المائه وظاهر كالباطن لا يحيد عنه

هل تريدين اناس تختار طريق من طريقين واسلوب من اسلوبين فاذا اختار الاقتناع بالفضيله فقد صار مستعصى على الفتن واقوى من الغرائز واصلب من الهوى

واعجب ما فى مقالتك هو الحل الذى تقترحينه بداية من نحاول نكون صادقين مع انفسنا وهو ما قلتليه الى اخر ما لم تقوليه امثال لو كل واحد يعرف ولو كل واحد يبدأ ولو كل واحد ...الخ

يا اختنا ان للانسان خلقه وفطره ونفسيه معقده وشخصيه تصارع طول حياتها بين الفضائل والغرائز وبين نداء الروح وهوى النفس

ولم يخلق الانسان الذى يسير على طريق واحد فلا يهوى ولا يميل ولا يخطئ ولا يمارس الانانيه ولا يتأرجح بين الخير وبعض الشر وبين الاستقامه وبعض الانحراف

فى النهايه ارجو ان تعتبرى كلامى مجرد رأى لا يفسد للود قضيه

تحياتى

EGYPT EYES يقول...

فعلا يادنيا الأنسان دا مخلوق غريب جدا ولو عايزه الحق يمكن يكون أغلبنا عنده جانب مظلم ومش شرط يكون الجانب دا شرير طبعا!!! ممكن يكون مجرد ملجأ بنحتمي بيه
أهو بوستك دا خلاني أفكر في الجانب المظلم الخاص بيا D:
تحياتي لك

الطائر الحزين يقول...

دنيا
مقدمة الجانب المظلم أهم من الجانب المظلم نفسة

اسمحى لى اختلف معك اختلافى السابق ان الرجل الفاضل ليس شرطا أن يكون بلا أخطااااااااااااااء لانه فى النهاية بشر وليس معنى ان الانسان منا ينقض فعل معين ويقوم هو نفسة بفعلة أن هذا يجعلنا لا نتقبل من هذا الشخص النصح مادام هذا النصح فى الجانب السوى الصحيح
كما قلت لحضرتك من قبل
انا اتقبل النصح من اى شخص كان ما دام كلامة صح بصرف النظر عن كينونة النصح

يعنى انا لى مادة النصح وليس الناصح نفسة.

اما الجانب المظلم حضرتك تقصدى ما يحمله القلب فى طياتة من بغض وكرة وحب

ليس معنى انى اغضب من انسان أن اول ما اقابلة اوبخة واقول له انت عملت كذا وكذا هذا يلغى التسامح بين الناس

يعنى مثال حضرتك للقرف والزهق بين الزوجين لو كل واحد زهق من مراتة او كل واحدة زهقت من جوزها قاعدوا واتحاسبوا على كل كبيرة وصغيرة لن تكون حياة لازم الواحد يفوت ويبقى مضايق ولا يظهر لعل الحياة تسير
والحب هو الذى يجعل الطرفان يتقبلا اخطاء بعضهما لكن هل سيصمد الحب امام اخطاء كل منهم طول العمر هذا هو السؤال

أما حرجنا عن السؤال عن اشياء وادعاء العلم بها فهذا يحرم الشخص مدعى العلم نفسة من المعرفة باشياء يجهلها ويمكن أن توكل له مهام على اساس علمة فلا يستطيع ان ينجزها فهو المضرور فى الأول وطبعا للباشمهندس عصفور تدوينة لأبو العريف و عائلتة

طولت عليكى
متأسف
تحياتى

حسن ارابيسك يقول...

لا
لسه بدري علينا عشان نتغير
كل اللي فينا ده
تراكم سنين طويله من التخلف والتربيه الغلط في البيت وفي مدارسنا وكلياتنا
للأسف
شعوب المنطقه العربيه كلها
تركيبتها الأساسية مبنيه على الأزدواجيه
داء وربنا أبتلانا بيه
وزي ما قلتي تقريبا علاجه في ايدينا
بس مين يقول ومين يسمع

دنــــيــــــا مـحـيـرنـي يقول...

مراكبي
شكرا يا اخي دائما كده رافع من معنوياتي بس احنا نجي ايه جنب حضرتك و اسلوب حضرتك احنا لسه بنتعلم شكرا جدا
----------------------------------
harmless
اولا انا سعيده جدا بوجودك بكلامك الرفيع علي مدونتي المتواضعه و هذا بجد يسعدني جدا
ثانيا اخي العزيز انا لا ازعل نهائيا من اي راي يخالفنا لاني اكيد ممكن استفيد منه و اعيد التفكير في اشياء اعتقد فيها ففي الاختلاف قمه الاستفاده لي و بسهوله لو اقتنعت اعلن ذلك فمرحبا بمخالفتك لي في اي شي
ثالثا بالنسبه لتعليق
انا لا املك فكريا احاديا بل كلامي هذا و تاملي في حالي قبل حال الناس يدعو الي المجاهده نعم مجهادة النفس في كل شيء سيء تحمله و ده طبيعي ان احنا بشر فينا الشر و الخير فيجب ان نجهاد الشر فينا و الغير صحيح هو ده الاي قصده مش بنفي وجود الخطا بل محاوله لاصلاحه
و اريد شي اخر و هو المتعلق بالجزء المظلم الذي اشرت انا له هو افسح الحريه للعقول و الافكار لتعرف و تسال و محاوله انتزاع اعتراف لا اعلم من انفسنا لنتعلم بس هو ده هدفي
و شكرا جدا علي رايك و كلماتك
---------------------------------
egypt eyes
شكرا يا رفيقي
بس ياريت تقولي جانبك المظلم بيقول ايه عايز اعرف يا صديقي
----------------------------------
الطائر الحزين
اخي العزيز كما قلت لك سابقا انا لا اغضب من اي اختلاف بذات لو اتي من شخص زي حضرتك
ثانيا بجد حضرتك انرت في عقلي نور مصباح لتفكير و اعاده النظر في بعض معتقداتي بجد احاول اعيد النظر و ده في حد ذاته تغير انا اجد صعوبه في تقبل النصح من شخص لا اقتنع به بالفعل اهتمامي بالشخص اكثر من النصيحه يمكن كلامك ده ممكن يغير ما ان فيه و اعيد التفكير تاني
و موافق ان الحياه لازم تمشي و نعدي حاجات بس لا تكون الحياه كلها كده عشان بمرور الوقت هانفقد اهميه الانسان ده في حياتنا يعني التعبير عما يدور في قلبي في حد ذاته نوع من التواصل و غسل القلوب
شكرا لك ثانيا و حضرتك تطول زي ما انت عايز المدونه بتاعتك
-------------------------------
حسن ارابيسك
بجد البوست كان ناقص كلامك ده وشرحك الملخص لاصل الحكايه شكر يا عزيزي

semsem يقول...

ازيك يا دنيا عامله ايه
هقول ايه بس
انا منت عملت بوست قبل كده عن موضوع ذى دا برضو وكنت بسال ايه الحل

wahed يقول...

يا سيدتي أنتي شخصتي كتير من أمراض المجتمع ووضعتي له روشته

لكن المشكله هنا هلي المريض هيتلزم بهذه الروشته!!؟

موضوعك مهم جدا جدا وبيناقش سلبيات وامراض أصابت المجتمع ,هذه السلبيات أعتاد عليها ووصل الي درجة ادمانها ,ومن ثم فعلاج هذه السلبيات تحتاج ال وقت طوييل حتي يبرا منها المجتمع

تحياتي لكي علي هذا الموضوع الهام

تسلم ايدك