١٣‏/٣‏/٢٠٠٨

حوار محبط جدا


انا :انا مضطهدة لاني محجبه و اغلب الاعمال الان لا تقبل المحجبات بناء علي تجارب طويله في حياتي العملية بالرغم انني عملت و لكني كنت غير راضيه بهذا العمل و لكني قبلته لانه قبلني بحجابي

انا مضطهده لاني اهلي كانوا ناس عادين و علموني تعليم عادي و الحقوني بمدارس عربيه و ليست لغات و طفحوا الدم الي ان وصلت للمرحلة الجامعيه و الحقت بكليه الشعب قسم عربي بعد السبع دوخات في نظام الثانويه العميه الفاشله و بناء علي ما سبق انا مرفوضه من جهات عمل كثيره لاني ليست خريجت لغات او كليه ذات صيت جيد

انا مضطهده لاني تزوجت و انجبت و سني عدي ال30واغلب جهات العمل يطلبون خريجين جدد ذو العشرينات بدون مسئوليات اجتماعيه و انشغالاتي باطفالي و زوجي سيعطلني عن العمل

انا انسحبت مؤقتا من سوق العمل لاربي اطفالي الصغار لانهم كانوا في حاجه لي و لم يطاوعني قلبي ان اتركهم بدون رعايه كافية في هذا السن الحرج و عندما اريد النزول مره اخري اجد صعوبات الف مره من بدايه تخرجي

نفسي : كلمه مضطهده ديه جامده شويه مش شافيه يا دنيا انك مكبرها شويه يعني عشان قبلت شويه صعاب تبقي مضطهده انتي عايزه تضحكي عليكي الناس

انا: عنك حق الواحد لازم يكون عنده شويه صبر لكن الصعوبات بتزداد يوم عن يوم انا محجبه و سعيده بكده وزوجه و ام ودول مش ينقصوني في شيء

نفسي : خليكي واقعيه يعني صاحب الشغل هاسيب البت الحلوه الاي عندها 22سنه و مش محجبه و عامله في نفسها حاجات علي الموضه اوي و خرجيت مدارس لغات و جامعه محترمه و هايبوصلك انتي فوقي بقي

انا : بلاش الكلام الاي ينرفز ده يعني المحترم في البلد ده ما ينفعش ولاد الناس العاديه في البلد ده ما ينفعوش يعني لازم اكون علي البحري و اكون بنت ناس اغنياء صرفوا جامد علي اعشان اعرف اعيش في ام البلد ديه

نفسي : ايوه ارتحتي بقي البلد ما بقتش بتاعتنا بتاعات الناس التانيه الاي صرفوا كتير اوي علي عيالهم و اتخرجوا بقي عشان يتعينوا بالالف الجنيهات فيلموا الفلوس الاي صرفوها تاني معادله سهله و بسيطه

انا: يا سلام علي عم اليأس و الاحباط لا البلد بلدنا و من حقنا زي ما علمونا يوفروا لينا الشغل المناسب بظروف مناسبه

نفسي : انتي هبله و عبيطه و بتدني في القمر مش مالطه و امال الشباب الرجاله الاي زي الورد يعملوا ايه علي الاقل انتي في كنف راجل يقدر يصرف عليكي اما دول مين يصرف عليهم فوقي شويه من الوهم الاي انتي عايشه فيه و بصي حولكي و انتي تعرفي حال الناس و البلد مشكلتك ابسط كتير من المشاكل التانيه يعني الاي يشوف مشاكل الناس تتنسف مشاكله اعقلي و اهدئي

انا : معني كلامك ان مستقبل عيالي زي الطين لو اديتلهم زي الاي ادولي اهلي يبقي مافيش فايده تعليم زفت و مافيش عمل طب انا خلفتوهم ليه و يعانوا زي ليه؟؟؟؟؟

نفسي : انتي غبيه و مش عايزه تفهمي الفلوس بتنادي الفلوس رايحي دماغك بقي عايزه تشتغلي اقبلي بالموجود القليل عشان انتي قليله تعليمك قليل شكلك قليل يبقي فلوسك هاتبقي قليله من الاخر

انا : واضح اني محبطه و كلامي متلخبط و دماغي هاتضرب خلاص

نفسي : عارفه يا دنيا ناس البلد ديه ملهاش غير رب كريم هو الاي بيمشي حياتهم و امورههم عشان كده رايحي دماغك و قولي يارب هو بس القادر علي فعل المعجزات

انا : انا مضطهده

نفسي : ما احنا قولنا بقالش الكلام الكبير ده الشعب اغلبه مضطهده مش انتي و بس

انا : حتي الكمبيوتر بتاعي اضطهادني الويندز اتضرب مرتين في خلال تلات ايام و رايح عند المهندس و هاقعد في البيت وشي في وشي الحيطه انا قلت انا مضطهده و محدش مصدقني

نفسي : المنحوس منحوس ولو علقوا علي بابه فانوس

هناك ١٨ تعليقًا:

http://kasperb4.blogspot.com/ يقول...

لا واضح فعلا انك محبطة
انا من رأيي تسمعي كلام الأنا وتسيبك من كلام نفسك
وفعلا يمكن اللي يصبرك شوية ان ده مش حالك لوحدك
ده حال اغلب الشباب النهاردة للأسف
وملناش غير ربنا سبحانه وتعالى

بالنسبة بقى للويندوز اللي مجننك ده
ياريت تزوري مدونتنا الجديدة اللي عاملنها عن الكمبيوتر
عشان ان شاء الله هنعمل فيها دروس عن صيانة الويندوز وحاجات تانية كتير
وان شاء الله لو تابعتينا مش هتحتاجي انك تستغني عن جهازك او انك تستني لحد ما المهندس يصلحهولك
وهتلاقي حاجات تانية تفيدك بإذن الله

http://computersal.blogspot.com
------

وبتمنى حالة الاحباط اللي عندك دي مطولش
وربنا يوفقك لما يحب ويرضى
:)

عصفور المدينة يقول...
أزال المؤلف هذا التعليق.
عصفور المدينة يقول...

ربنا يفك كروبك ويرضي نفسك

mohand يقول...

مش مضطهده

زمان اترفضت "جايه من مرفوض " من شغل عشان انا مسلم

مقولتش انا مضطهد ولا حاجه
الشغل مطلوب ميكونش الشخص مسلم يبقي مش عيب فيا

الشغل اللي عايز مش محجبه
لان صاحب الشغل عايز مانيكان مش عايز عقليه
ودا لا يقلل من قيمتك
انتي مش عايزه تبقي مانيكان يبقي عادي
كوني نفسك

حاولي تزودي مهاراتك
بالشكل اللي يرضيكي
وانتي هتلاقي المكان المناسب

وعموما الشغل قليل اليومين دول

تحياتي

Bella يقول...

اختي العزيزة

مااحبش اشوفك كده

ولا ناوية اديكي خطب ومواعظ

انا بس نفسي تروقي كده وماتزعليش

انت ممكن تعملي شغل وانت في البيت

يعني لو عندك هواية معينة حاولي تشتغلي بالهواية دي ودي ممكن تجيب لك فلوس

انا نفسي فكرت اعمل كده في فترات ياس وزهق من شغلي

يعني رغم اني باشتغل بس فكرت اغير شغلي واعمل حاجة تانية احس اني باحبها
وكمان علشان شغلي مسبب لي ضغوط على مستويات كتيرة

ماعلينا بعدين ابقى اقول لك الحاجات دي

المهم مش عايزاكي تزعلي قوي كده وتعكنني على نفسك

الحمد لله ان عندك زوج واولاد ربنا يبارك لك فيهم ويسعدك بيهم يارب

روقي كده

الهرم مقلوب في البلد من فترة طويلة وحتى المجتهدين اللى حفروا في الصخر باظافرهم بيلاقوا اللى يكسر مجاديفهم لان الناس اتعودت على النطاعة وعلى ان فلان ابوه بيعملوا كذا وعلانة ابوها بيعمل لها كيت

فيطلع لهم واحد مكافح يبين حجمهم الحقيقي ومتصورة انهم ح يسيبوه يتحرك بهدوء ومن غير مايعكننوا عليه

على فكرة اللى باقوله لك مش بس بيحصل على مستوى العمل

ده كمان بيحصل على مستويات اكبر بكتير

يعني مثلا خدي عندك موضوع الزواج

تلاقي البنت الدلوعة اللى ماتعرفش تملا كوباية مية من الحنفية الف من يتعاطف معها باعتبارها بنت عز وماتعرفش طريق المطبخ فين والكل يبقى مسخر لخدمتها بمزاجه طبعا لانه ايه يخليه يتعب نفسه ويقدر اللى بتعرف تتصرف في حاجات حتى لو بسيطة

وتلاقي بنت العز دي بقى الكل بيخطب ودها رغم علمهم العميق انها لاتصلح لتربية ابناء ولا تتحمل حتى مسؤولية نفسها وبعد ماتقع الفاس في الراس تبدأ الشكوى من سوء الاختيار

يعني المواويل دي دائمة التكرار لدرجة مملة ومحبطة

بس نقول ايه

لما الناس تفكر بدماغها ومش بحاجة تانية ممكن يبتدي الهرم يتعدل

ولحد مايحصل كده ربنا يعيننا على هذه الايام

روقي دمك وماتزعليش

غير معرف يقول...

سيدتى المحترمة جدا
أولا إلى أن تحصلى على عمل لا يحبطك أحب أن ألفت نظر حضرتك و أنتى خير العارفين أمامك مهمة مقدسة و هى تربية أبنائك تربية إسلامية يرضى عنها ربك و يكونوا من جيل النصرة بإذن الله
سيدتى كونى مع الله دوما و سيفرج كربك و حزنك تمنياتى القلبية بحياة سعيدة مطمئنة..أبو خالد

الطائر الحزين يقول...

ليس مطلوب منا الا السعى اما النتائج فمردها الى الله

وفقك الله

انت نصرتى الله بالثبات على مبدأه فأنتظرى نصر الله

وفقك الله

bota يقول...

السلام عليكم
الحوار واقعي اوي
بس صدقيني لو ليكي رزق ونصيب انك تشتغلي يبقى بغض النظر عن اي حاجه هتشتغلي
وعجبتني اوي فكره بيلا انك تشوفي اكيد عندك حاجه بتحبيها ممكن تنميها وتبدأي فيها ولو بمشروع صغير جدآ وان شاء الله ربنا يكرمك
وبعدين فعلا هو ده حال البلد الواحد بيصعب عليه حال الشباب
بس ربنا يرحمنا برحمته
ومتشليش هم ولادك انتي اهم حاجه ربيهم صح وخليهم يطلعو احسن منك ومني يطلعو يعرفو ياخدو حقهم
وربنا يوفقك

Lasto-adri *Blue* يقول...

وليه تفكرى فى شغل عند حد؟
لو عندك هواية ليه ما تعمليهاش...
ليه ما تخليش شغلك تنمية فكرك عشان تبنى أطفال همه اللى ح يشيلوا بكرة بجد؟

لو فكرتى إنك مضطهدة.. ح تفضلى فعلا مضطهدة..
دلوقتى اصحاب الشغل عايزيين الحرك.. اللى مش بيضيع عمره منتظر الفرصة.. انما اللى بيفكر إزاى يعمل فرصة
:)

ما تضيقيش نفسك وإسعى... إسعى بجد.. ربنا بيقف جانب الواحد ما تعرفيش إزاى

حسن ارابيسك يقول...

دنيا

حوار مع الذات جميل..
حوار فيه عدل لأطراف الموضوع في الحوار
ولو بنعمل كده في كل مشاكلنا مع الغير ونضع أنفسنا مكانهم هانكتشف حاجات كتيرة ونعرف كمان اللي لينا واللي علينا تجاه الأخرين ومانزعلش من حد

لكن طبعاً بمناسبة حوارك مع الذات في نقطة معينة طبعا مش هاقولك هانعرف اللي لينا واللي علينا
لكن هاقولك نعرف اللي علينا فقط
لأن مابقاش لينا في البلد دي على حد نتاج حوارك الذاتي

تحياتي
مع تمنياتي لكِ بالتوفيق إن شاء الله وصلاح الحال
تحياتي
حسن أرابيسك

ibn_abdel_aziz يقول...

"تزوجت و انجبت و سني عدي ال30واغلب جهات العمل يطلبون خريجين جدد ذو العشرينات بدون مسئوليات اجتماعيه و انشغالاتي باطفالي و زوجي سيعطلني عن العمل
"
هذا ظلم ولا يوجد مثيل له حتي في الغرب
العمر ليس عائقا عن العمل بل هو يعبر عن الخبرة
نحن في بلد لا تقدر ذلك
اعلانات التوظيف في مصر في بعض الدول تكون مخالفة للقانون
قانونيا يتم تجريم اي مكان عمل يحدد جنس او دين او سن الموظف

وانتي عندك جق ...هذا ظلم مبين
القياس الوحيد الذي يؤخذ به
هل تقدرين علي اداء الوظائف المنوطة بكي ام لا؟
فان كانت الاجابة بنعم
فهذا يكفي



هناك من رايتهم يختارون المحجبات ليوظفهون ويرفضون غير المحجبات
والعكس ايضا
وكلاهما فعل جور وظلم وخلاف الاصل
والاصل في التوظيف هو البحث عن الامين الكفؤ وفقط
فمن ادي الوظيفة كما ينبغي هو من يستحق التعيين

لا تشعري بالاضطهاد ولكن تمسكي بحقك
وحقك لن يضيع طالما ظللتي تطالبين به
وستحصلين عليه ان شاء الله

محمد عبد الغفار يقول...

الدنيا هى هى الفرق الوحيد هو النظارات التى نرتديها

دنـيـا محيراني(ايناس لطفي يقول...

شكرا يا اعزاء الناس لدي بالفعل اشعر بكل كلمه منكم انكوا تحاولوا ان تخففوا عني ما اشعر به و لكني كنت صريحه مع نفسي الحاله عامه و مش خاصه و احب ان اطمنكوا انا الان بقيت كويسه الحمد لله و اشكر كل واحد منكوا اراد ان يخفف علي و بالفعل هذا حدث و اكيد ان شاء الله ربنا هايكرم
ويوفق هو شويه صبر مع قوة ايمان و اكيد ربنا هايكرم شكرا جدا جدا للوقوف بجانبي فكلماتكوا بالنسبة لي هي اجمل شيء يحدث لي
شكرا جزيلا تحياتي

غير معرف يقول...

السلام عليكم ورحمة الله وبركاته
حوار صادق مع الذات فجر قضية هامة
ألا وهى قضية الاضطهاد ...
و الاضطهاد هنا فى أسوأ صوره اضطهاد من أجل التمسك بعقيدتى .. والجانب الممارس للاضطهاد يماثلنى فى العقيدة ولكنه تهاون فيها وأصبح ضحية أفكار علمانية شيطانية

نعم هو الآخر ضحية...

سبحان الله .. أصبح الإسلام محارباً فى أرضه ومن أبنائه ...

أختى الكريمة : اثبتى على المبدأ وتأكدى من أنه ابتلاء من الله ..

وستكون الجائزة فرج من عند رب العباد
تدخل السرور إلى قلبك

بارك الله فيك وأعزك

أخوك
محمد

البنت الشلبية يقول...

سلام عليكم
ازيك اختى عاملة ايه
فكيها كده
انا دخلت عشان اسمل عليكى واشوف اخبارك ايه
اتمنى انى اسمع اخبار سعيدة عنك قريب ان شاء الله

يا مراكبي يقول...

حوار لا ألومك عليه .. ففيه الكثير من الحقيقة للأسف

لكن في النهاية .. لن يصح إلا الصحيح .. وإن لم يصح في الدنيا فسيصح في الآخرة .. يضحك كثيرا من يضحك أخيرا

فقط صبرا .. فتأييد الله لمن هو الحق آت لا محالة

أحساس لسه حى ...أنا مش موافق يقول...

عزيزتى
نفسك معاها حق انتى مش مضطهده كده

الاضطهاد شئ اكبر من كده بكتير

الحجاب بيتهد فى اعمال معينه بس بس لكثرة الحجاب فى بلدنا بقه اكتر الاعمال تقبل بالحجاب بس اكيد فى اعمال لو ادامه اختيارين بين محجبه ومش محجبه هيختار المحجبه

انتى مش مضطهده لان اهلك على الاقل علموكى امال اللى اهلها مش بيعلموها او يخرجوها من ابتدائى تقول ايه ومش مهم مدرستك كانت ايه المهم انتى ايه والناس طبيعى مش لازم تكون زى بعضها
لازم تكون درجات فى كل شئ اكل ولبس وتعليم كمان

انتى مش مضطهده لانك على الاقل الحمد الله تزوجتى وانجبتى فيه كتير نساء عدوا الثلاثين ولم يتزوجوا وتقريبا لن يتزوجوا تفتكرى ده تاثيره ايه عليهم النفسى والجسدى اكتر من الاضطهاد طيب فى تزوجوا ولن ينجبوا ابدا برضوا ده هنسميه ايه بالنسبه لما عانيتيه من الزواج بعد الثلاثين

انتى مش مضطهده لانك انسحبتى عن سوق العمل لتربيه اولادك لان فيه اولادهم محتاجين وجودهم ومش عارفين ينسحبوا من سوق العمل


اللى انتى بتقوليه معناه والدنيا متبقاش دنيا من غير معناه

بس الحمد الله

لسه الدنيا مضطهدتكيش لحد دلوقتى

واكيد المعناه دى مفيش حد مش بيمر بيها فى دنيته

كل ما تتوجعى من شئ ادعى ربنا يعوضهالك يا بعدين يا فى الاخره

والمنحوس لو شوفتيه هتحسى انك محظوظه جداااااا

تحياتى يا افندم

سلام

دنـيـا محيراني(ايناس لطفي يقول...

انا اسفه يا جماعة الفترة الاي فاتت جهازي كان بايظ كان روحي كانت بعيده عني عشان كده لم اري او ارد علي اي احد سامحوني شكرا جدا جدا علي كل كلمه اتكتبت فيها تشجيع و رفع الروح المعنويه عندي و اكيد كل كلمه بتفرق معي جدا شكرا جزيلا جدا لكل واحد منكم يا اجمل اصدقاء في الدنيا كلها
تحياتي