حياتنا ماهي الا دواير
بنلف فى دواير والدنيا تلف بينا
دايما ننتهى ... لمطرح ماابتدينا
طيور الفجر تايهة فى عتمة المدينة
بتدور .....
....
مابنكتبشى الرسايل مابننتظرشى رد
لا حد فى يوم سمعنا...ولا بنسمع حد
طيور العمر تايهة فى عتمة المدينة
بتدور .....
....
ساكنين فى عالم يعشق الخطر
فيه الطيور تهرب من الشجر
وتهرب النجوم من القمر ... وتهرب الوجوه من الصور
...
بنلف فى دواير ندور عالامان
ونلاقينا رجعنا تانى لنفس المكان
ندور .. ندور .. ندور...
...
نحلم ...ونحلم ... بالحياة المفرحة
واتارى احلامنا بلا اجنحة ... بلا اجنحة
...
ندور .... ندور ... ندور ... بجناح حزين مكسور
ساعات نشوف فى العتمة .. وساعات نتوه فى النور
ساعات عيوننا بالاسى تفرح ... وساعات فى ساعة الفرح منوحة ...
...
اغنية دواير -مروان خوري - عبد الرحمن الابنودي
حياتنا ما هي الا دواير وبنلف فيها
اغنية دواير -مروان خوري - عبد الرحمن الابنودي
حياتنا ما هي الا دواير وبنلف فيها
هناك ١٥ تعليقًا:
يسعدنى طبعا انى أكون أول واحد يعلق على الموضوع
مع انه أغنية و ليس من ‘بداعك
بس برضوا بيدل على إحساسك و عبقريتك حتى فى اختيار الأغانى اللى بتحبيها و بتسمعيها
الأغنية دى بجد انا باحبها جدا لانها أغنية بتلخص اللى احنا فيه بالفعل و حتى فيلم أوقات فراغ كان فيلم صريح جدا و حقيقىو معبر جدا جدا جدا عن كل شبابا مصر اللى مش عارف هو رايح فين و مش لاقى اللى ياخد بايده حتى لو حاول يعمل حاجة بجد
شكرا إيناس بجد لعرض الموضوع ده
انا فى الاول افتكرت ان دى كلماتك ..
عموما
واضح انك حسيت وتلمست مدى جمال واحساس المعانى ..وطبعا واكيد ده له علاقة بما فى داخلك من ذوق ومشاعر
ولكن
مازلنا ننتظر المزيد من مواضيعك الجميلة ..وبلاش كسل!!
تحياتى والسلام
عزيزي كريم
الاعغنية ديه بتقول عن حاجات كتير كلنا بنعاني منها من مشاعر واحسايس ضائعه وبتضيع منا ربنا يساعدنا
وجودك دائما بيسعدني
------------------
وميض ابتسامه
عندك حق القلم كسلان اوي معي الايام ديه
هحاول والله شكرا لوجودك
كلامك جميل جدا يا ايناس و البلوج بتاعك روعة
أغنية رايقة صحيح
لكن هو مش ممكن يجي اليوم اللي نكسر فيه الدواير دي ونعرف طريقنا صح بقى
ممكن ؟؟ حد عارف ؟؟؟؟
رمضان كريم
فعلا هيا دواير عمالين نلف فيها
في رباعية دايماً بتلح عليا واستعارتها في موضوع كتبته قبل كده
إنما البوست بتاعك ده استدعاها تاني علشان تنط قدامي للمرة المليون
إقلع غماك يا تور وارفض تلف … اكسر تروس الساقية واشتم وتف … قال : خطوة كمان وخطوة كمان … يا أوصل نهاية السكة يا البير تجف.
:(
وليد
ما أكثر من يتيهون في النور
شكرا لنقلك لكلمات الابنودي الجميلة
الحياه ماشيه فى سكتها الوحيد اللى بيلف الدواير الثور فى الساقية
محمد سلامه
شكرا علي ذوق يا فندم
--------------
صاحب المضيفه
يارب نعرف في يوم نكسر الدواير
الله اكرم يا فندم
----------------
بسمه
كلنا بنلف ربنا يهون
------------------
وليد
احلي رد علي البوست والله يا وليد انت دائما كده متفائل يارب اكون زيك
تحياتي
----------------------
جني
ربنا ينور لينا الطريق شكرا لتواجدك
---------------
عزيزي محمد
امال احنا ايه في الدنيا ديه مش تور وبنلف بس كل واحد حسب ساقيته
منورني بقالك كتير غايب
تحياتي
طبعا معاكى حق
حياتنا دواير
تتداخل وتتباعد
وتظل فى نفس الدائرة
تحياتى
بما انها ليست من جعبتكِ
ولكنها جزء من معاناتك
فكلي أخرى ليست لي وليست من جعبتي
لفوا بينا قالوا لينا قالوا لينا عالمدينة
القلق جوه العيون وشها له الف لون
حزنها غير حزننا منها واحنا وحدنا
في المدينة هناك
لما جينا والتقينا كل شئ فيها ناسينا
يامدينة فيكي ماشي قلبي قمرايه بشواشي
مهما تعصري قلبنا مش هايكدب صدقنا
لفوا بينا قالوا لينا قالوا لينا عالمدينة
تحياتي لإنتقاءك الجميل الموجع
حسن ارابيسك
بلو ويف
ربنا يفكنا منها يارب
------
حسن ارابيسك
دائما تجعل من البوست بتعليقك اجمل واجمل يا صديقي
اختيار موفق ويرد علي الكلام بكلام اجمل مختار ايضاء تحياتي
الجميله ايناس
سعيده بالتعرف عليكي جدا جدا .....
الاغنيه بحبها جدا ودايما ببكي وانا بسمعها ..يحييكي علي اختيارك ليها
محتاجه وقت اطول علي مدونتك الرقيقه
لانه اكتر ما انتي عايزه تتكلمي انانفسي اسمعك......
خالص تحياتي ومودتي
اميره جمال
لوممكن كل ماتنزل
قصيده تقبله بى قصيده اخره
من صلاح جهيان اوالتونسى
ولو ممكن تنزله اغانى كلمات الابنودى
الله عليك يا محمد ياثروت فى تجسيد كلمات الابنودى
لممه تقول حاسب على جلبى حاسب لممه تسلم علي سلام اسف على الازعاج
إرسال تعليق